|
Prif Ddigwyddiadau Hwylio ym Mhwllheli
2012
Mae’n bleser gan Glwb Hwylio Pwllheli gyhoeddi eu rhaglen o brif achlysuron hwylio ar gyfer tymor 2012.
Fel dywed Gareth Roberts, ein Rheolwr Digwyddiadau, “Ym mlwyddyn y Gemau Olympaidd, rydyn ni’n hynod falch o groesawu i’n plith y pencampwriaethau Finn Rhyngwladol Meistri’r Byd a’r Gystadleuaeth Gosod Safleoedd Rhyngwladol cychod Laser y DU. Ymhlith hwylwyr y ddau ddosbarth hwn, mae yna rai sydd â gobaith ennill medalau Olympaidd yn Awst 2012 yn Weymouth. Rydyn ni hefyd yn gartref pencampwriaethau’r DU ar gyfer y dosbarthiadau “bwydo Olympaidd” iau y cychod Optimists a Topper. Rhain fydd y ddwy gystadleuaeth fwyaf ar gyfer dingis yn y DU yn ystod y flwyddyn.
“Mae Pwllheli, heb unrhyw amheuaeth, ymhlith y lleoliadau hwylio pwysicaf yn y DU ac wrth i’r Academi Hwylio Genedlaethol newydd gael ei chodi, mae’r rhagolygon yn parhau’n llewyrchus ar gyfer hwylio yng Nghymru.”
1 - 6 Ebrill RYA - Pencampwriaethau Ieuenctid y DU
Dyma brif ddigwyddiad rhaglen hwylio ieuenctid y DU ac yma y dewisir hwylwyr i gynrychioli’r DU ym mhencampwriaethau Byd y Ffederasiwn Hwylio Rhyngwladol (ISAF). Rhagwelir y byd d yno dros 220 o bobl ifanc (dan 19) yn cystadlu mewn 6 dosbarth dingi a hwylfyrddio.
21 - 22 Ebrill Pencampwriaethau Ieuenctid a Iau Cymru.
Dros 120 o oreuon ifanc a iau Cymru yn ymgiprys i fod yn bencampwyr hwylio cenedlaethol.
27 Mai - 1 Mehefin Pencampwriaethau Finn Rhyngwladol Meistri’r Byd (Finn World Masters).
Dyma’r pencampwriaethau sy’n cael eu hwylio yn y math o gwch ddaeth a medal aur i Ben Ainsley yn y gemau Olympaidd ar ddau achlysur. Mae’r cystadleuwyr dros 40 oed a dyfernir gwobrau yn ôl categorïau oedran, gan gynnwys “Y Chwedlonol” (Legends) sydd dros 70 mlwydd oed. Rhagwelir y bydd dros 150 o gystadleuwyr, yn cynnwys cyn hwylwyr Olympaidd, o Ewrop a gweddill y Byd. Yn ystod y pencampwriaethau hyn, bydd y fflam Olympaidd yn cael ei chario drwy Bwllheli ar 28 Mai.
22 - 27 Gorffennaf Pencampwriaethau Rhyngwladol Cenedlaethol ar gyfer cychod Topper y DU
Disgwylir y bydd dros 350 o gystadleuwyr ifanc yn yr ornest hon. Dyma’r achlysur ail fwyaf ar gyfer un dosbarth drwy’r holl DU yn ystod 2012. Fel llwybr tuag at lawryfon Olympaidd, mae’r gystadleuaeth wedi cynhyrchu llawer o ddarpar hwylwyr ar gyfer Tîm Olympaidd Prydain, gan gynnwys y tri brawd, Dyfrig, Eifion a Bleddyn Môn, o Ynys Môn. Bydd Pencampwriaethau Byd y dosbarth hwn yn cael ei gynnal ym Mhwllheli yn 2014.
12 - 17 Awst Pencampwriaethau Rhyngwladol Cenedlaethol ac Agored cychod Optimist y DU.
Rhagwelir y bydd y Pencampwriaethau hyn yn denu dros 450 o hwylwyr (dan 16) o fwy na 15 o wledydd. Dyma’r achlysur mwyaf ar gyfer un dosbarth o gychod fydd i’w gael yn y DU yn 2012. Yn y gorffennol, mae enillwyr o’r dosbarth hwn wedi mynd ymlaen i ennill anrhydeddau Olympaidd a Byd-eang yn ddiweddarach yn eu gyrfa, ac mae’r rhain yn cynnwys aelodau o dîm Hwylio Prydain ar gyfer Gemau Olympaidd Llundain 2012, Hannah Mills a Ben Ainslie.
19 - 24 Awst Pencampwriaethau Cenedlaethol Firefly y DU
Cwch dingi 12 troedfedd i ddau ydy’r “Firefly” a rhagwelir y bydd dros 120 yn dod i gystadlu. Cynlluniwyd y cwch gan Uffa Fox, fe’i defnyddiwyd yn y Gemau Olympaidd ym 1948 ac mae’n boblogaidd ar gyfer rasio timau, gan gynnwys Pencampwriaethau Byd Timau Rasio’r Ffederasiwn Hwylio Rhyngwladol (ISAF).
26 - 31 Awst Pencampwriaethau Cenedlaethol Cherub y DU
Dingi 12 troedfedd hynod o gyflym gyda sbinacr anghymesur a dwbl-trapîs ydy’r “Ceriwb”. Dyma ddosbarth o gychod arloesol o ran dyluniad a deunydd – tua 70 cilogram ydy pwysau’r cychod a rhagwelir y bydd gweithgareddau’r 60 o hwylwyr yn peri cryn ryfeddod.
8 - 11 Medi. Pencampwriaethau RS 300 a 600 y DU
Dyma gychod dingi cyflym o’r dosbarth RS ar gyfer un hwyliwr – a bydd y ddau ddosbarth yn rasio am bedwar diwrnod o hwylio. Mae’r RS 300 yn gwch dingi ‘heicio’ chwim tra bod yr RS 600 yn gwch dingi trapîs.
6 - 7 Hydref. Cystadleuaeth Gosod Safleoedd Rhyngwladol cychod Laser y DU
Mae dau ddosbarth cychod laser, yn seiledig ar faint eu rig hwyliau. Dosbarth safon Olympaidd i ddynion ydy’r Rig Safonol tra bod y Rig Radial ar gyfer cychod dingi Olympaidd un person i ferched. Disgwylir y daw 130 i gystadlu am bwyntiau gosod safleoedd rhyngwladol ar gyfer 2013.
26 - 27 Hydref. Cyfres “Grand Prix” y DU ar gyfer cychod “29er” rhyngwladol.
Sgiff antur dau berson, gyda sbinacr cymesur a thrapîs, sy’n cael ei hwylio’n bennaf gan hwylwyr ifanc. Mae’n llwybr i handlo cychod mwy o faint, megis y “49er” Olympaidd. Disgwylir gweld dros 60 o hwylwyr yn y gystadleuaeth hon, sy’n rhan o gyfres o rasys drwy’r DU.
Pwyllgor Digwyddiadau
Clwb Hwylio Pwllheli Sailing Club
Academi Hwylio Genedlaethol Cymru a Chanolfan Digwyddiadau
Tachwedd 2011
Am ragor o wybodaeth cysylltwch â Gareth Roberts yn y clwb hwylio ar 01758 613343 neu
Mae'r cyfeiriad ebost yn cael ei warchod rhag spam bots, rhaid i chi alluogi Javascript i'w weld.
I’r Golygyddion
Mae Clwb Hwylio Pwllheli yn glwb aelodaeth cysylltiol gyda’r RYA, corff llywodraethol hwylio yn y DU, sy’n darparu’r awdurdod ar gyfer rheoli digwyddiadau hwylio dan ei Reolau Rasio, a’r rheiny wedi eu cymeradwyo gan ISAF, y corff rheoli rhyngwadol.
Pwllheli ydy un o’r pedar lleoliad arfordirol yn rhwydwaith academi’r RYA a’r unig un yng Nghymru.
Yn y flwyddyn 2010 dyfarnwyd swm o £9.6 miliwn i Gyngor Gwynedd gan gronfeydd Llywodraeth Cymru a Chydgyfeirio Ewrop ar gyfer adeiladu prosiect cyfalaf, sydd i gynnwys adeilad academi newydd ac adnoddau cysylltiol ar lan y dwr. Bydd y gwaith adeiladu yn cychwyn yn gynnar yn 2012, a’i gwblhau yn nhymor yr hydref 2013.
|
